جاوید احمد غامدی

جاوید احمد غامدی کی پیدایش 18 اپریل 1951ء کو ضلع ساہیوال کے ایک گاؤں جیون شاہ کے نواح میں ہوئی۔ عربی و فارسی کی ابتدائی تعلیم ضلع ساہیوال ہی کے ایک گاؤں نانگ پال میں مولوی نور احمد صاحب سے حاصل کی۔ انھوں نے گورنمنٹ کالج لاہورسے1972ء میں انگریزی ادب میں بی۔ اے آنرز (پارٹ ون) کیا اور دینی علوم قدیم طریقے کے مطابق مختلف اساتذہ سے پڑھے۔ قرآن و حدیث کے علوم و معارف میں برسوں مدرسۂ فراہی کے جلیل القدر عالم اور محقق امام امین احسن اصلاحی سے شرف تلمذ حاصل رہا۔ ان کے دادا نور الٰہی کو لوگ گاؤں کا مصلح کہتے تھے۔ اسی لفظ مصلح کی تعریب سے اپنے لیے غامدی کی نسبت اختیار کی اور اب اسی رعایت سے جاوید احمد غامدی کہلاتے ہیں۔ غامدی صاحب 1980ء سے دینی علوم پر علمی اور تحقیقی کام انجام دے رہے ہیں۔ اسلامی محقق و دانشور کے علاوہ غامدی صاحب کا ایک ادبی تعارف بھی ہے جو ان کی شخصیت کے جمالیاتی پہلو کو نمایاں کرتا ہے۔ اور ان کا شعری مجموعہ کلام ’’خیال و خام‘‘ شائع ہو چکا ہے۔ یہ مجموعہ اُن کے ادبی ذوق کا مظہر ہے۔