"کیہ کری جا رہیائیں"

"کیہ کری جا رہیائیں" لِکھیا سی نا اُستاد دامن نے لکھدا تے نہیں سی بولدا سی اوہ پتہ سی اوہنوں ایہہ بولی بولدیاں زندہ رہندی اے لِکھیاں مر جاندی اے متروک الفاظ لیا واڑدے نیں وِچ تہاڈے جیہے صندوق پرانے موسم نوں تُساں رُت نہیں کیتا؟ رُت پنجابی اے کہ ہندی پتہ وی کیتا جے؟ کدیں بہار وی لکھ جاندے او وِچ وِچ بہار خزاں دا اُلٹ اے اسم خاص نوں عام بنا دِتا جے تہذیب ثقافت کلچر نوں کدیں رہریت کدے رہتل وسیب معاشرہ کلاس نوں میل بنائی آوندے او اپنی جنج چاڑھن لئی تُسیں ایس زبان نوں کِسے مقام تے بہن دینا محروماں نوں حق لَین نہیں دینا عوام نوں خلقت خلق لوکائی لِکھ لِکھ ہتھوں گوائی جاندے او انقلاب اُتھل ہوگیائے آونا تے اُنج وی کوئی نہیں سی ہُن بقر عید تے دیو جماعت نوں، کَھلّ ہوگیائے بولی زندگی اے کون سمجھائے، ایہنے بدلنا ای ہوندائے پہلوں سنسکرت پھیر عربی فارسی اُردو ہُن انگریزی کیہڑی دیوار کھڑی کرو گے ساڈے اگے اپنے جیسے یاجُوجاں ماجُوجاں کولوں چٹواون لئی