جی میں آتا ہے کہ پھر مژگاں کو برہم کیجیے

کاسۂ دل لے کے پھر دریوزۂ غم کیجیے

گونجتا تھا جس سے کوہ بے ستون و دشت نجد

گوش جاں کو پھر انہیں نالوں کا محرم کیجیے

حسن بے پروا کو دے کر دعوت لطف و کرم

عشق کے زیر نگیں پھر ہر دو عالم کیجیے

دور پیشیں کی طرح پھر ڈالیے سینے میں زخم

زخم کی لذت سے پھر تیار مرہم کیجیے

صبح سے تا شام رہیے قصۂ عارض میں گم

شام سے تا صبح ذکر زلف برہم کیجیے

دن کے ہنگاموں کو کیجیے دل کے سناٹے میں غرق

رات کی خاموشیوں کو وقف ماتم کیجیے

دائمی آلام کا خوگر بنا کر روح کو

ناگہانی حادثوں کی گردنیں خم کیجیے

غیظ کی دوڑی ہوئی ہے لہر سی اصنام میں

جوشؔ اب اہل حرم سے دوستی کم کیجیے

جوش ملیح آبادی

جوشؔ کا اصلی نام شبیر حسن خاں تھا جو 5 دسمبر 1898 کو ملیح آباد (اتر پردیش) میں پیدا ہوئے۔ خاندانی حسب نسب کے اعتبار سے ان کے اجداد یوسف زئی پٹھان تھے جو افغانستان سے ہجرت کر کے ہندوستان آ گئے تھے۔ ملیح آباد میں سکونت اختیار کر لی تھی اور نوابین اودھ کے دربار میں اعلیٰ عہدوں پر فائز تھے۔جوشؔ نے کچھ غزلیں بھی کہیں لیکن ان کی شہرت کا دارومدار نظموں پر ہے۔ انہوں نے تحریک آزادی کی حمایت میں نظمیں کہیں تو انہیں ملک گیر شہرت حاصل ہوگئی اور انہیں شاعرانقلاب کے لقب سے یاد کیا جانے لگا۔ ان کی سیاسی نظموں پر طرح طرح کے اعتراضات کیے گئے۔ خاص طور پر یہ بات کہی گئی کہ وہ سیاسی شعور سے محروم اور انقلاب کے مفہوم سے ناآشنا ہیں۔ ان نظموں میں خطابت کے جوش کو سوا اور کچھ نہیں لیکن اس حقیقت سے انکار مشکل ہے کہ ملک میں سیاسی بیداری پیدا کرنے اور تحریک آزادی کو فروغ دینے میں جوشؔ کی نظموں کا بڑا حصہ ہے۔

جی میں آتا ہے کہ پھر مژگاں کو برہم کیجیے

More poems from same author

Unlock the Power of Language & AI

Lughaat

Spell Checker

OCR