دوستو وقت ہے پھر زخم جگر تازہ کریں

پردہ جنبش میں ہے پھر آؤ نظر تازہ کریں

تاکجا نالۂ غربت کہ چلی باد شمال

دل میں پھر زمزمۂ عزم سفر تازہ کریں

آؤ پھر دھوم سے ہو آج غروب اور طلوع

سنت بندگئ شمس و قمر تازہ کریں

آؤ چل کر رخ نا شستہ کو دیکھیں دم صبح

موج رنگ افق و نور سحر تازہ کریں

کلہ فقر کو کج کر کے سر بزم نشاط

آؤ رسم کہن تاج و کمر تازہ کریں

آؤ پھر جلوۂ جاناں پہ لٹا دیں کونین

شغل پارینۂ ارباب نظر تازہ کریں

طبق زر میں لگا کر پئے نظر جاناں

آؤ پھر آبروئے لعل و گہر تازہ کریں

آؤ پھر جوشؔ کو دے کر لقب شاہ سخن

دل و دین سخن و جان ہنر تازہ کریں

جوش ملیح آبادی

جوشؔ کا اصلی نام شبیر حسن خاں تھا جو 5 دسمبر 1898 کو ملیح آباد (اتر پردیش) میں پیدا ہوئے۔ خاندانی حسب نسب کے اعتبار سے ان کے اجداد یوسف زئی پٹھان تھے جو افغانستان سے ہجرت کر کے ہندوستان آ گئے تھے۔ ملیح آباد میں سکونت اختیار کر لی تھی اور نوابین اودھ کے دربار میں اعلیٰ عہدوں پر فائز تھے۔جوشؔ نے کچھ غزلیں بھی کہیں لیکن ان کی شہرت کا دارومدار نظموں پر ہے۔ انہوں نے تحریک آزادی کی حمایت میں نظمیں کہیں تو انہیں ملک گیر شہرت حاصل ہوگئی اور انہیں شاعرانقلاب کے لقب سے یاد کیا جانے لگا۔ ان کی سیاسی نظموں پر طرح طرح کے اعتراضات کیے گئے۔ خاص طور پر یہ بات کہی گئی کہ وہ سیاسی شعور سے محروم اور انقلاب کے مفہوم سے ناآشنا ہیں۔ ان نظموں میں خطابت کے جوش کو سوا اور کچھ نہیں لیکن اس حقیقت سے انکار مشکل ہے کہ ملک میں سیاسی بیداری پیدا کرنے اور تحریک آزادی کو فروغ دینے میں جوشؔ کی نظموں کا بڑا حصہ ہے۔

دوستو وقت ہے پھر زخم جگر تازہ کریں

More poems from same author

Unlock the Power of Language & AI

Lughaat

Spell Checker

OCR