دل آزادہ رو میں وہ تمنا تھی بیاباں کی

قدم رکھتے ہی شق ہونے لگی دیوار زنداں کی

خدا کی رحمتیں اے مطرب رنگیں نوا تجھ پر

کہ ہر کانٹے میں تو نے روح دوڑا دی گلستاں کی

یہ ثابت کر دیا تجھ کو بنا کر دست قدرت نے

کہ ہو سکتی ہیں اتنی خوبیاں صورت میں انساں کی

نسیم صبح ٹھنڈی سانس بھرتی ہے مزاروں پر

اداسی منہ اندھیرے دیکھیے گور غریباں کی

یہ عالم کیا ہے اک مجموعہ ہے ناچیز ذروں کا

یہ دنیا کیا ہے اک ترکیب اجزائے پریشاں کی

ہواؤں کے وہ جھونکے وہ کھلے میدان کی سردی

وہ لہریں چاند سے رخسار پر زلف پریشاں کی

ہماری زندگی کیا سلسلہ اک دل دھڑکنے کا

ہماری موت کیا جنبش ہے اک جذبات پنہاں کی

بنا دیں گی یقیں ہے جوشؔ مرد باخدا اک دن

تپش اندوزیاں سینے میں برق سوز پنہاں کی

جوش ملیح آبادی

جوشؔ کا اصلی نام شبیر حسن خاں تھا جو 5 دسمبر 1898 کو ملیح آباد (اتر پردیش) میں پیدا ہوئے۔ خاندانی حسب نسب کے اعتبار سے ان کے اجداد یوسف زئی پٹھان تھے جو افغانستان سے ہجرت کر کے ہندوستان آ گئے تھے۔ ملیح آباد میں سکونت اختیار کر لی تھی اور نوابین اودھ کے دربار میں اعلیٰ عہدوں پر فائز تھے۔جوشؔ نے کچھ غزلیں بھی کہیں لیکن ان کی شہرت کا دارومدار نظموں پر ہے۔ انہوں نے تحریک آزادی کی حمایت میں نظمیں کہیں تو انہیں ملک گیر شہرت حاصل ہوگئی اور انہیں شاعرانقلاب کے لقب سے یاد کیا جانے لگا۔ ان کی سیاسی نظموں پر طرح طرح کے اعتراضات کیے گئے۔ خاص طور پر یہ بات کہی گئی کہ وہ سیاسی شعور سے محروم اور انقلاب کے مفہوم سے ناآشنا ہیں۔ ان نظموں میں خطابت کے جوش کو سوا اور کچھ نہیں لیکن اس حقیقت سے انکار مشکل ہے کہ ملک میں سیاسی بیداری پیدا کرنے اور تحریک آزادی کو فروغ دینے میں جوشؔ کی نظموں کا بڑا حصہ ہے۔

دل آزادہ رو میں وہ تمنا تھی بیاباں کی

More poems from same author

Unlock the Power of Language & AI

Lughaat

Spell Checker

OCR