یوں ڈھل گیا ہے درد میں درماں کبھی کبھی

نغمے بنے ہیں گریۂ پنہاں کبھی کبھی

ہونکی ہیں باد صبح کی رو میں بھی آندھیاں

ابلا ہے ساحلوں سے بھی طوفاں کبھی کبھی

بڑھتا چلا گیا ہوں انہی کی طرف کچھ اور

یوں بھی ہوا ہوں ان سے گریزاں کبھی کبھی

آنچوں میں گنگناتے ہیں گلزار گاہ گاہ

شعلوں سے پٹ گیا ہے گلستاں کبھی کبھی

لے سے نکل پڑی ہے کبھی ہچکیوں کی فوج

آہیں بنی ہیں راگ کا عنواں کبھی کبھی

دامان گل رخاں کی اڑا دی ہیں دھجیاں

پھاڑا ہے ہم نے یوں بھی گریباں کبھی کبھی

کلیاں جھلس گئی ہیں دہکنے لگے ہیں پھول

یوں بھی چلی ہے باد بہاراں کبھی کبھی

اس وقت بھی کہ خاطر مجموعہ تھی نصیب

کم بخت دل ہوا ہے پریشاں کبھی کبھی

جوش ملیح آبادی

جوشؔ کا اصلی نام شبیر حسن خاں تھا جو 5 دسمبر 1898 کو ملیح آباد (اتر پردیش) میں پیدا ہوئے۔ خاندانی حسب نسب کے اعتبار سے ان کے اجداد یوسف زئی پٹھان تھے جو افغانستان سے ہجرت کر کے ہندوستان آ گئے تھے۔ ملیح آباد میں سکونت اختیار کر لی تھی اور نوابین اودھ کے دربار میں اعلیٰ عہدوں پر فائز تھے۔جوشؔ نے کچھ غزلیں بھی کہیں لیکن ان کی شہرت کا دارومدار نظموں پر ہے۔ انہوں نے تحریک آزادی کی حمایت میں نظمیں کہیں تو انہیں ملک گیر شہرت حاصل ہوگئی اور انہیں شاعرانقلاب کے لقب سے یاد کیا جانے لگا۔ ان کی سیاسی نظموں پر طرح طرح کے اعتراضات کیے گئے۔ خاص طور پر یہ بات کہی گئی کہ وہ سیاسی شعور سے محروم اور انقلاب کے مفہوم سے ناآشنا ہیں۔ ان نظموں میں خطابت کے جوش کو سوا اور کچھ نہیں لیکن اس حقیقت سے انکار مشکل ہے کہ ملک میں سیاسی بیداری پیدا کرنے اور تحریک آزادی کو فروغ دینے میں جوشؔ کی نظموں کا بڑا حصہ ہے۔

یوں ڈھل گیا ہے درد میں درماں کبھی کبھی

More poems from same author

Unlock the Power of Language & AI

Lughaat

Spell Checker

OCR