یہ نصیب شاعری ہے زہے شان کبریائی

یہ نصیب شاعری ہے زہے شان کبریائی کہ ملے نہ زندگی بھر مجھے داد خوش نوائی بخدا عظیم تر ہے شہدا کے خون سے بھی مرے سینۂ قلم میں جو بھری ہے روشنائی یہ عجیب ماجرا ہے کہ خدیو ہفت قلزم طرف سراب دوڑے پئے قسمت آزمائی فلک اور اسے جھکائے سر منزل سفیہاں ملک آئیں جس کے در پر بہ ہوائے جبہ سائی چمن شعور نو کو جو لہو سے اپنے سینچے کبھی اس کو سکھ نہ بخشے کوئی پنجۂ حنائی ہمہ ساز ہوں بظاہر ہمہ سوز ہوں بہ باطن مری زندگی بکائی مری شاعری غنائی مرے تار و پود لرزاں بہ ہوائے نا مرادی مرے خد و خال درخشاں بہ تبسم ریائی مرا دل ہے گریہ مسکن مرے لب ترانہ منزل مری نے شکست خاطر مری لے ہے مومیائی مرا جام شب سلیماں ہمہ تاج خسروانہ مری چشم روز پیما ہمہ کاسۂ گدائی مری بارگاہ ہستی ہمہ عجز بندگانہ مری بارگاہ مستی ہمہ سطوت خدائی در خلق پر جھکا ہے نہ جھکے گا تا قیامت سر جوشؔ میں بھرا ہے وہ غرور کبریائی