اے بہ رخ مصحف گلزار و چراغ حرم غنچگی و آیۂ گل باری و قرآن بہار

اے بہ قد موج رواں برق تپاں سرو سہی شاخ گل تازہ و الہام خرامان بہار

پئے گل گشت ذرا اس قد بلائے فلک تاب و چمن ساز کو دے اذن خرام

کہ ترے ہجر میں بے کیف ہے بے روح ہے بے تاب ہے بے خواب ہے لیلائے خیابان بہار

بزم کی بزم ہے پژمردہ و افسردہ و دل بستہ و خاموش و ملول و غم ناک

کھول دے کاکل ژولیدہ و شب رنگ و جہاں صید و گہر بیز کہ ہے چشمۂ حیوان بہار

آ بھی جنبش میں کہ ہیں گوش بر آواز ادیبان و حریفان و گل و لالہ و سرو

اے لب لعل فسوں بار و دل آویز شکر ریز کہ ہے تجھ پہ فدا لرزش دامان بہار

بربط و عود و شراب و دف و افسانہ و افسون و شب ماہ و رباب و ساغر

آ کہ مشتاق ہیں اے جان چمن زہرہ جبیں ہوش ربا ماہ لقا شمع شبستان بہار

دہر ہے خفتہ و آشفتہ و آزردہ و غم دیدہ و ناشاد و زبوں حال و تباہ

ہاں اٹھا نرگس مخمور و گہر تاب و جنوں خیز کہ ہے محبس مے خانہ و زندان بہار

آج ہے حافظ شیرازیؔ و خیامؔ و نظیریؔ و فغانیؔ و ظہوریؔ کا جواب

یہ ترا جوشؔ کہ ہے مست و خراباتی و سر حلقۂ رندان جہاں قبلۂ خاصان بہار

جوش ملیح آبادی

جوشؔ کا اصلی نام شبیر حسن خاں تھا جو 5 دسمبر 1898 کو ملیح آباد (اتر پردیش) میں پیدا ہوئے۔ خاندانی حسب نسب کے اعتبار سے ان کے اجداد یوسف زئی پٹھان تھے جو افغانستان سے ہجرت کر کے ہندوستان آ گئے تھے۔ ملیح آباد میں سکونت اختیار کر لی تھی اور نوابین اودھ کے دربار میں اعلیٰ عہدوں پر فائز تھے۔جوشؔ نے کچھ غزلیں بھی کہیں لیکن ان کی شہرت کا دارومدار نظموں پر ہے۔ انہوں نے تحریک آزادی کی حمایت میں نظمیں کہیں تو انہیں ملک گیر شہرت حاصل ہوگئی اور انہیں شاعرانقلاب کے لقب سے یاد کیا جانے لگا۔ ان کی سیاسی نظموں پر طرح طرح کے اعتراضات کیے گئے۔ خاص طور پر یہ بات کہی گئی کہ وہ سیاسی شعور سے محروم اور انقلاب کے مفہوم سے ناآشنا ہیں۔ ان نظموں میں خطابت کے جوش کو سوا اور کچھ نہیں لیکن اس حقیقت سے انکار مشکل ہے کہ ملک میں سیاسی بیداری پیدا کرنے اور تحریک آزادی کو فروغ دینے میں جوشؔ کی نظموں کا بڑا حصہ ہے۔

اے بہ رخ مصحف گلزار و چراغ حرم غنچگی و آیۂ گل باری و قرآن بہار

More poems from same author

Unlock the Power of Language & AI

Lughaat

Spell Checker

OCR