کیتی اے وانگ سوہنیاں سوہنی ادا خدا
دل دردمند دے کے نہ دتی دوا خدا
دنیا خاطر حسن دی کیوں خورے عشقَ نوں
بے عیب زندگی دی ہے دتی سزا خدا
دکھیار کوئی کیہنوں پکارے خدا بغیر
دکھیار دا ہے جگّ تے کیہڑا سوا خدا
وچھڑے ملاپ توں نہ وچھوڑے ملاپ دے
رہِ کے ہمیش نال رہیا اے جدا خدا
دوزخ ڈروں تے رہِ اسیں متھے ہاں رگڑدے
کردا اے بندگی دا پیا حق ادا خدا
بندے نے موت تے چا اساری اے زندگی
بدھی اے جیون دی جے مرن تے بنا خدا
پیراں تے سوہنیاں دے دھرن سر کویں نہ رند
بخشش لئی اے لوڑدا سوہنی خطا خدا
مندے اسیں وی اوہدی خدائی دے زور نوں
سندا کدے جے ساڈی وی کوئی دعا خدا
کرنا سی انج ظلم کیوں میں آپ جان تے
کہہ کے الست پائی میرے گل بلا خدا
کیتی بتاں جفا دی کرامت عجب 'فقیر'
کردے نے بت پرست پئے بہہ کے خدا خدا
ڈاکٹر فقیر محمد فقیر