ساویں تول نگاہواں دے اج نیویں تلدے ویکھے نے
اکھاں ویکھیاں اکھاں نوں دل دلاں نوں بھلدے ویکھے نے
کلّ ہوا نوں بوٹیاں اتے باغیں ہسدے سن ملے
اج ہنیری پتر جیہڑے راہ وچ رلدے ویکھے نے
مالی اج خزاں دے سانوں اینے دین ڈراوے پئے
اساں بہاراں وچ خزاں دے جھکھڑ جھلدے ویکھے نے
ہویا کی اج ساقی تیرے میخانے دی مستی نوں
اک دوجے ول گھوریاں پاؤندے دیدے کلّ دے ویکھے نے
غم نہیں ہو گئے گچھا مچھا دھاگے نے جے سانجھاں دے
پیار دیاں ڈوراں دے گنجھل پیندے کھلدے ویکھے نے
دانے محرم ٹھپی رکھن سدا کتاب محبت دی
دل والے دل نال نہ دل دا ورقہ تھلدے ویکھے نے
دکھاں دا ہن عادی ایں توں ہس دلا وچ دکھاں دے
کنڈیاں دے وچ وسن والے کھڑدے پھلدے ویکھے نے
ویکھیاں اہدیاں موڑاں اتے سہکدیاں کئی ہیراں نے
عشقَ دے راہواں وچ اساں کئی رانجھے رلدے ویکھے نے
کھونجے بیٹھا خورے کہڑیاں سوچاں وچ فقیر پیا
ٹھنڈیاں ہوکیاں نال اج اوہدے ہنجھو ڈلھدے ویکھے نے
ڈاکٹر فقیر محمد فقیر