جِتھے جِتھے لگ سکدے سی لا دِتے نیں شیشے
باقی دے میں حرفاں نال بنا دِتے نیں شیشے
توں حالے وے پتھراں دے ای راگاں وچ ایں پِھردا
میں تے خورے کِتھے کِتھے گا دِتے نیں شیشے
ویکھ لیا جے ہوجانا اے سبھ کُجھ شیشا شیشا
ہولی ہولی اینے کو ورتا دِتے نیں شیشے
سارے جگ دی دھوڑ دے وچ وی میلے ہو نہیں سکدے
اِکو گھر نے جگ تے جو چمکا دِتے نیں شیشے
لئی پِھرنے آں دِل تے اکھ نوں اُنج پر کِہنوں دسّیے
کِنے چِر توں سجناں نے تِڑکا دِتے نیں شیشے
جے نہ اپنا آپ سیہانن ایہ لوکاں دی مرضی
ویلے نے تے کئی کئی وار وکھا دِتے نیں شیشے
انھیاں نوں وی دِسدے پئے نیں سندھو اِک اِک کرکے
کِتھے سن تے کِتھوں تک اپڑا دِتے نیں شیشے
ارشاد سندھو