دستاویز

اوہدے ہونٹھاں دی دو ورقیاں والی دستاویز میرے سامنے کھلی پئی تے میں ایہنوں نیجھ لا کے پڑھ رہیا صرف کوئی کوئی فقرہ پلے پیندا ایس دستاویز دی عبارت دے ہیٹھاں بوہت سارے دستخط لال، کالے،نیلے کوئی دستخط صاف پڑھے جاندے کوئی اکاہی اپنے آپ وچ گواچے ہوئے تے کوئی بڑے تکھے جیہے، جیویں کوئی سوال پہلی نظرے ایہہ کوئی اپیل جاپدی یاں کسے اگزی بیشن دے رجسٹردا اوہ پنا جیہدے اتے واپس جان لگیاں تسیں گھٹو گھٹ اپنے دستخط ضرور کردے ایہہ دستاویز ہوئی وی انہوئی تے ایہہ دستاویز بڑی میلی تے گندی تے مڑی تڑی تے کتوں کتوں بڑی شوخ تے کھچری جیویں ہندی اے وکاو رناں دی جوانی کھچری تے شوخ میں دستخط وچ اپنے ہتھ پچھان رہیا تے نیجھ لا کے پڑھ رہیا ایہدی عبارت نوں صرف دسخطاں دی گنتی دن پر دن ودھدی جاندی ایہہ دستخط چکلے دی عورت دے پنڈے اتے لگے رنگ برنگے داغ تے ایہہ عورت دل دے رنگدار ٹکٹاں والے لفافے وچ بند ہونا منگدی صرف اک ہتھ دی لکھی چٹھی بن کے بڑے ہی سبک تے کولے ہتھاں وچ جان لئی (1970)