اک یاد

اوہ دن میرے اندروں کس نوں لبھدے کس نوں سوچدے اوہ دن مینوں کیہ دسدے میتھوں کیہ پُچھدے اوہ دن مینوں کیہ دیندے میتھوں کیہ منگدے اوہ دن میرے اوارہ پیراں دی بھٹکن دے دن میرے گناہواں دے دن کیہڑے زخماں دا حساب منگدے تے کیہڑا نواں ادھار چاہڑ دے کیہ دساں کون اے اوہناں دناں دے روح وچ سمایا ہویا کون اے اوہناں دناں دے پنڈے وچ گھلیا ہویا کوئی نہیں، کوئی نہیں صرف پیراں دے کجھ نشان کجھ نہیں، کجھ نہیں صرف اک پیڑ دا ویران چہرہ تے اک اجاڑ روحاں تے جسماں وچ ڈگ کے ٹٹیا اے اپنا منہ لکو لے تیرے پھٹڑ ہونٹھ جے کسے ویکھ لئے تاں تیری یاد ننگی ہو جائے گی تیرے ضمیر وانگر (1970)