بُلّھا کیہ جاناں مَیں کَون

نہ میں مومن وچ مسیت آں

نہ میں وِچ کُفر دی ریت آں

نہ میں پاکاں وچ پلیت آں

نہ میں مُوسٰی، نہ فرعون

بُلّھا کیہ جاناں میں کَون

نہ میں اندر بید کتاباں

نہ وِچ بھنگاں، نہ شراباں

نہ وِچ رِنداں مست خراباں

نہ وِچ جاگن، نہ وِچ سون

بُلّھا کیہ جاناں میں کَون

نہ وِچ شادی نہ غمناکی

نہ میں وِچ پلیتی پاکی

نہ میں آبی نہ میں خاکی

نہ میں آتش نہ میں پَون

بُلّھا کِیہ جاناں میں کون

نہ میں عربی نہ لاہوری

نہ میں ہِندی شہر نگوری

نہ ہندُو نہ تُرک پشَوری

نہ میں رہندا وچ ندَون

بُلّھا کِیہ جاناں میں کون

نہ میں بھیت مذہب دا پایا

نہ میں آدم حوّا جایا

نہ میں اپنا نام دھرایا

نہ وِچ بَیٹھن، نہ وِچ بَھون

بُلّھا کِیہ جاناں میں کون

اَوّل آخر آپ نُوں جاناں

نہ کوئی دُوجا ہور پچھاناں

میتھوں ہور نہ کوئی سیانا

بُلّھا! اوہ کھڑا ہے کون

بُلّھا کِیہ جاناں میں کون

سید عبداللہ شاہ قادری بُلھے شاہ

بُلھے شاہ (۱۶۸۰-۱۷۵۷) پنجابی دےصوفی شاعراں وچوں ایک وڈے شاعر نیں- بابا بُلھے شاہ قصور دے سیّد گھرانے وچّ پیدا ہوئے، اوہناں دے والد دا تعلق اُچّ گیلانیاں توں سی تے روزگار لئی اوہ قصور آ وسّے- سیّد خاندان توں تعلق رکھدیاں ہویاں وی اوہناں نے ایک آرائیں بزرگ شاہ عنایت دی بیعت کیتی تے قادری سلسلے نال جڑ گئے- اوہنآں دا بوہتا کلام کافیاں دی صورت وچّ اے پر اوہنآں شاعری دیاں دوسریاں قسماں سی حرفی تے بارا ماہ وچّ وی طبع آزمائی کیتی- بلھے شاہ اپنے دبنگ لہجے پاروں مشہور نیں تے معاشرے دی قدامت پرستی تے بنیاد پرستی دے سخت مخالف نیں-

بُلّھا کیہ جاناں مَیں کَون

More poems from same author

Unlock the Power of Language & AI

Lughaat

Spell Checker

OCR