آؤ سَیّو رل دیو نی ودھائی

میں ور پایا رانجھا ماہی

اَج تاں روز مبارک چڑھیا

رانجھا ساڈے ویہڑے وڑیا

ہتھ کُھونڈی موڈھے کمبل دھریا

چاکاں والی شکل بنائی

آؤ سَیّو رل دیو نی ودھائی

میں ور پایا رانجھا ماہی

مُکٹ گُئواں دے وِچ رُلدا

جنگل جُوہاں وِِچ کس مُل دا

ہے کوئی اللہ دے ول بھلدا

اصل حقیقت خبر نہ کائی

آؤ سَیّو رل دیو نی ودھائی

میں ور پایا رانجھا ماہی

بُلّھے شاہ اِک سودا کِیتا

پتیا زہر پیالہ پیتا

نہ کُجھ لاہا ٹوٹا لیتا

درد دُکھاں دی گٹھڑی چائی

آؤ سَیّو رل دیو نی ودھائی

میں ور پایا رانجھا ماہی

سید عبداللہ شاہ قادری بُلھے شاہ

بُلھے شاہ (۱۶۸۰-۱۷۵۷) پنجابی دےصوفی شاعراں وچوں ایک وڈے شاعر نیں- بابا بُلھے شاہ قصور دے سیّد گھرانے وچّ پیدا ہوئے، اوہناں دے والد دا تعلق اُچّ گیلانیاں توں سی تے روزگار لئی اوہ قصور آ وسّے- سیّد خاندان توں تعلق رکھدیاں ہویاں وی اوہناں نے ایک آرائیں بزرگ شاہ عنایت دی بیعت کیتی تے قادری سلسلے نال جڑ گئے- اوہنآں دا بوہتا کلام کافیاں دی صورت وچّ اے پر اوہنآں شاعری دیاں دوسریاں قسماں سی حرفی تے بارا ماہ وچّ وی طبع آزمائی کیتی- بلھے شاہ اپنے دبنگ لہجے پاروں مشہور نیں تے معاشرے دی قدامت پرستی تے بنیاد پرستی دے سخت مخالف نیں-

آؤ سَیّو رل دیو نی ودھائی

المزيد من كتابات هذا المؤلف

استفد من نور اللغة والذكاء الاصطناعي۔

لغات

مدقق إملائي

التعرّف الضوئي على الحروف