آ مِل یارا سار لے میری

میری جان دُکھاں نے گھیری

اندر خواب وچھوڑا ہویا، خبر نہ پیندی تیری

سُنجی بن وِچ لُٹی سائیاں، سُور پلنگ نے گھیری

مُلّاں قاضی راہ بتاون، دین بھرم دے پھیرے

ایہہ تاں ٹھگ جگت دے جِھیور، لاون جال چوپھیرے

کَرم شرع دے دَھرم بتاون، سَنگل پاون پیریں

ذات مذہب ایہہ عشق نہ پچھدا، عِشق شرع دا ویری

ندیوں پار مُلک سجن دا، لہر لوبھ نے گھیری

ستگور بیڑی پھڑی کھلوتے، تیں کیوں لائی آ دیری

بُلّھا شاہ شَوہ تینُوں مِلسی، دل نُوں دے دلیری

پیتم پاس، تے ٹولنا کس نوں، بُھل گیوں شِکر دوپہری

آ مِل یارا سار لے میری

میری جان دُکھاں نے گھیری

سید عبداللہ شاہ قادری بُلھے شاہ

بُلھے شاہ (۱۶۸۰-۱۷۵۷) پنجابی دےصوفی شاعراں وچوں ایک وڈے شاعر نیں- بابا بُلھے شاہ قصور دے سیّد گھرانے وچّ پیدا ہوئے، اوہناں دے والد دا تعلق اُچّ گیلانیاں توں سی تے روزگار لئی اوہ قصور آ وسّے- سیّد خاندان توں تعلق رکھدیاں ہویاں وی اوہناں نے ایک آرائیں بزرگ شاہ عنایت دی بیعت کیتی تے قادری سلسلے نال جڑ گئے- اوہنآں دا بوہتا کلام کافیاں دی صورت وچّ اے پر اوہنآں شاعری دیاں دوسریاں قسماں سی حرفی تے بارا ماہ وچّ وی طبع آزمائی کیتی- بلھے شاہ اپنے دبنگ لہجے پاروں مشہور نیں تے معاشرے دی قدامت پرستی تے بنیاد پرستی دے سخت مخالف نیں-

آ مِل یارا سار لے میری

المزيد من كتابات هذا المؤلف

استفد من نور اللغة والذكاء الاصطناعي۔

لغات

مدقق إملائي

التعرّف الضوئي على الحروف