یوں کہنے کو پیرایۂ اظہار بہت ہے

یہ دل دل ناداں سہی خوددار بہت ہے

دیوانوں کو اب وسعت صحرا نہیں درکار

وحشت کے لیے سایۂ دیوار بہت ہے

بجتا ہے گلی کوچوں میں نقارۂ الزام

ملزم کہ خموشی کا وفادار بہت ہے

جب حسن تکلم پہ کڑا وقت پڑے تو

اور کچھ بھی نہ باقی ہو تو تکرار بہت ہے

خود آئینہ گر آئینہ چھوڑے تو نظر آئے

دہکا ہوا ہر شعلۂ رخسار بہت ہے

منصف کے لیے اذن سماعت پہ ہیں پہرے

اور عدل کی زنجیر میں جھنکار بہت ہے

زہرا نگاہ

محترمہ زہرا نگاہ 14 مئی، 1936ء حیدرآباد، دکن، برطانوی ہندوستان میں علمی گھرانے میں پیدا ہوئیں۔ ان کا اصل نام فاطمہ زہرا ہے۔ آپ کے والد قمر مقصود کا شمار بدایوں کے ممتاز لوگوں میں ہوتا ہے۔ جبکہ مشہور ڈراما نویس فاطمہ ثریا بجیا آپ کی بڑی بہن اور مقبول عام ہمہ جہت مصنف انور مقصود بھائی ہیں۔ زہرا نگاہ کا خاندان تلاش معاش میں حیدر آباد دکن میں آباد ہو گیا۔ تقسیم ہند کے بعد زہرا نگاہ اپنے خاندان کے ساتھ حیدر آباد دکن سے ہجرت کر کے کراچی آ گئیں اور یہیں پر اپنی تعلیم مکمل کی۔ حکومت پاکستان نے ان کی خدمات کے صلے میں صدارتی تمغا برائے حسن کارکردگی کا اعزاز عطاکیا۔

یوں کہنے کو پیرایۂ اظہار بہت ہے

More poems from same author

Unlock the Power of Language & AI

Lughaat

Spell Checker

OCR