ہے جو درویش وہ سلطاں ہے یہ معلوم ہوا

بوریا تخت سلیماں ہے یہ معلوم ہوا

دل آگاہ پشیماں ہے یہ معلوم ہوا

علم خود جہل کا عرفاں ہے یہ معلوم ہوا

اپنے ہی واہمے کے سب ہیں اتار اور چڑھاؤ

نہ سمندر ہے نہ طوفاں ہے یہ معلوم ہوا

ڈھونڈنے نکلے تھے جمعیت خاطر لیکن

شہر کا شہر پریشاں ہے یہ معلوم ہوا

ہم نے آبادیٔ عالم پہ نظر جب ڈالی

دل کی دنیا ابھی ویراں ہے یہ معلوم ہوا

انقلاب آپ ہی دنیا میں نہیں آتے ہیں

وہ نظر سلسلہ جنباں ہے یہ معلوم ہوا

بادشاہی بھی نظر آتی ہے محتاج خراج

تاج کشکول گدا یاں ہے یہ معلوم ہوا

ان کے قدموں پہ جو گر جائے وہی قطرۂ اشک

حاصل دیدۂ گریاں ہے یہ معلوم ہوا

ان کی نظروں پہ جو چڑھ جائے وہی ذرۂ خاک

سرمۂ چشم غزالاں ہے یہ معلوم ہوا

ان کے در تک جو پہنچ جائے وہی آبلہ پا

رہبر قافلۂ جاں ہے یہ معلوم ہوا

آبیاری جو کرے خون رگ جاں تو صباؔ

دل ہر ذرہ گلستاں ہے یہ معلوم ہوا

صبا اکبر آبادی

صبا اکبرآبادی 14 اگست، 1908ء کو آگرہ، برطانوی ہندوستان میں پیدا ہوئے۔ ان کا اصل نام خواجہ محمد امیر تھا۔ صبا اکبر آبادی کی شاعری کا آغاز 1920ء سے ہوا۔ شاعری میں ان کے استاد خادم علی خاں اخضر اکبر آبادی تھے۔ 1927ء میں وہ شاہ اکبر داناپوری کے صاحبزادے شاہ محسن داناپوری کے حلقۂ ارادت میں داخل ہوئے اور اسی وسیلے سے انھیں تصوف کی دنیا سے شناسائی ہوئی۔ 1928ء میں انھوں نے ایک ادبی ماہنامہ آزاد نکالا۔ کچھ عرصے بعد انھوں نے رعنا اکبر آبادی کے رسالے مشورہ کی ادارت بھی سنبھالی۔ تقسیم ہند کے بعد انھوں نے حیدرآباد (سندھ) اور پھر کراچی میں سکونت اختیار کی اور بہت جلد یہاں کی ادبی فضا کا ایک اہم حصہ بن گئے۔ انھوں نے مختلف النوع ملازمتیں بھی کیں اور تقریباً ایک سال محترمہ فاطمہ جناح کے پرائیویٹ سیکریٹری بھی رہے۔ صبا اکبر آبادی کے شعری مجموعوں میں اوراق گل، سخن ناشنیدہ، ذکر و فکر، چراغ بہار، خونناب، حرز جاں، ثبات اور دست دعا کے نام شامل ہیں اس کے علاوہ ان کے مرثیوں کے تین مجموعے سربکف، شہادت اور قرطاس الم کے نام سے شائع ہو چکے ہیں۔ انھوں نے عمر خیام، غالب، حافظ شیرازی اور امیر خسرو کے منتخب فارسی کلام کا منظوم اردو ترجمہ کیا جن میں سے عمر خیام اور غالب کے تراجم اشاعت پزیر ہو چکے ہیں۔ ان کی ملی شاعری کا مجموعہ زمزمۂ پاکستان قیام پاکستان سے پہلے شائع ہوا تھا۔ انھوں نے ایک ناول بھی تحریر کیا تھا جو زندہ لاش کے نام سے اشاعت پزیر ہوا تھا۔ صبا اکبرآبادی 29 اکتوبر، 1991ء کو اسلام آباد، پاکستان میں وفات پاگئے۔ انہیں کراچی میں سخی حسن قبرستان میں سپردِ خاک کیا گیا۔

ہے جو درویش وہ سلطاں ہے یہ معلوم ہوا

More poems from same author

Unlock the Power of Language & AI

Lughaat

Spell Checker

OCR