الجھنوں میں کیسے اطمینان دل پیدا کریں

بجلیوں میں رہ کے تنکوں کا بھروسہ کیا کریں

ضبط آنسو جب کئے تو اچھلا چہرے پر لہو

غم کی موجیں روکنے سے راستہ پیدا کریں

کہتے ہیں قصہ زمانے سے یہی تشویش ہے

سی لئے ہیں لب مگر ان آنسوؤں کو کیا کریں

ہم بھی بندے ہیں ہمیں بھی مقدرت اتنی تو ہے

وہ خدا بن جائے جس کے سامنے سجدا کریں

طاقت دیدار ظاہر اور آنکھوں کو یہ شوق

بس تمہیں دیکھا کریں دیکھا کریں دیکھا کریں

چاہتے یہ ہیں کہ راہ زندگی ہموار ہو

سوچتے یہ ہیں کہ دنیا کو تہہ و بالا کریں

بے وفا سورج ڈھلا جاتا ہے چشم شوق سے

اور کب تک اعتبار وعدۂ فردا کریں

مصلحت کا یہ تقاضا ہے کہ ہنسنا چاہئے

بزم ہستی میں صباؔ کب تک غم دنیا کریں

صبا اکبر آبادی

صبا اکبرآبادی 14 اگست، 1908ء کو آگرہ، برطانوی ہندوستان میں پیدا ہوئے۔ ان کا اصل نام خواجہ محمد امیر تھا۔ صبا اکبر آبادی کی شاعری کا آغاز 1920ء سے ہوا۔ شاعری میں ان کے استاد خادم علی خاں اخضر اکبر آبادی تھے۔ 1927ء میں وہ شاہ اکبر داناپوری کے صاحبزادے شاہ محسن داناپوری کے حلقۂ ارادت میں داخل ہوئے اور اسی وسیلے سے انھیں تصوف کی دنیا سے شناسائی ہوئی۔ 1928ء میں انھوں نے ایک ادبی ماہنامہ آزاد نکالا۔ کچھ عرصے بعد انھوں نے رعنا اکبر آبادی کے رسالے مشورہ کی ادارت بھی سنبھالی۔ تقسیم ہند کے بعد انھوں نے حیدرآباد (سندھ) اور پھر کراچی میں سکونت اختیار کی اور بہت جلد یہاں کی ادبی فضا کا ایک اہم حصہ بن گئے۔ انھوں نے مختلف النوع ملازمتیں بھی کیں اور تقریباً ایک سال محترمہ فاطمہ جناح کے پرائیویٹ سیکریٹری بھی رہے۔ صبا اکبر آبادی کے شعری مجموعوں میں اوراق گل، سخن ناشنیدہ، ذکر و فکر، چراغ بہار، خونناب، حرز جاں، ثبات اور دست دعا کے نام شامل ہیں اس کے علاوہ ان کے مرثیوں کے تین مجموعے سربکف، شہادت اور قرطاس الم کے نام سے شائع ہو چکے ہیں۔ انھوں نے عمر خیام، غالب، حافظ شیرازی اور امیر خسرو کے منتخب فارسی کلام کا منظوم اردو ترجمہ کیا جن میں سے عمر خیام اور غالب کے تراجم اشاعت پزیر ہو چکے ہیں۔ ان کی ملی شاعری کا مجموعہ زمزمۂ پاکستان قیام پاکستان سے پہلے شائع ہوا تھا۔ انھوں نے ایک ناول بھی تحریر کیا تھا جو زندہ لاش کے نام سے اشاعت پزیر ہوا تھا۔ صبا اکبرآبادی 29 اکتوبر، 1991ء کو اسلام آباد، پاکستان میں وفات پاگئے۔ انہیں کراچی میں سخی حسن قبرستان میں سپردِ خاک کیا گیا۔

الجھنوں میں کیسے اطمینان دل پیدا کریں

More poems from same author

Unlock the Power of Language & AI

Lughaat

Spell Checker

OCR