ملی بھی کیا در دولت سے کار عشق کی داد
یہی کہ تیشۂ فرہاد بر سر فرہاد
رخ نمو کو شکایت فقط خزاں سے نہیں
بہار میں بھی ہوئی کشت جسم و جاں برباد
دوام مانگ رہا ہوں گزرتے لمحوں سے
ہے زندگی سے محبت ہی زندگی کا تضاد
زمانے بھر کے غموں سے الگ تھلگ رہ کر
سکوں بہت ہے مگر ہے دل سکوں برباد
شعور غم خبر زیست اعتبار وجود
سزا ہے یا کہ جزا ہے یہ عالم ایجاد
متاع شعر و سخن بھی جبھی سلامت ہے
کہ میرے لوگ مری بستیاں رہیں آباد
مآل کوہ کن و قیس دیکھ کر بھی سحرؔ
چلے ہیں کوئے تمنا کو ہر چہ باد اے باد
سحر انصاری