ملے تو ایسے کہ جیسے بڑی محبت ہے

خدا کا نام لو یہ بھی کوئی محبت ہے

مجھے پتا ہے کہ انجام عشق کیا ہو گا

تمہاری پہلی مری ددوسری محبت ہے

ہماری چھوٹی سی اک بات ٹال دی تم نے

چلو چلو بڑے آئے بڑی محبت ہے

جڑی ہوئی ہے معیشت سے خوئے دل داری

ٹکے کا عشق ہے دو پیسے کی محبت ہے

یہ کہہ کے اس نے مجھے مخمصے میں ڈال دیا

ملاؤ ہاتھ اگر واقعی محبت ہے

گلے لگا کے تو ملتا ہے جب بھی ملتا ہے

چلو یہی سہی منہ دیکھے کی محبت ہے

جاوید صبا عہد حاضر کے ایک ممتاز شاعر ہیں۔ ان کا اصل نام سید جاوید حسن ہے اور 03 مارچ 1958 میں پاکستان کے شہر کراچی میں آنکھ کھولی۔

Unlock the Power of Language & AI