تیری خوش بو کدھر نہیں آتی

میں جدھر ہوں ادھر نہیں آتی

جو میسر ہے وہ مہیا نہیں

نیند بھی خواب بھر نہیں آتی

اے خموشی ذرا نظر تو اٹھا

بات بنتی نظر نہیں آتی

حسن آرائش جمال تو دیکھ

زلف تا بہ کمر نہیں آتی

دور تک ساتھ ساتھ چلتی ہے

زندگی راہ پر نہیں آتی

وقت رک رک کے ساتھ چلتا ہے

رات ڈھلتی نظر نہیں آتی

بہت آسان ہے یہ دل کی زباں

سیکھ لیجے اگر نہیں آتی

ساتھ لاتی ہے ایک اک منظر

یاد کچھ بھول کر نہیں آتی

کون ہے جو نظر نہیں آتا

ایک صورت نظر نہیں آتی

نیند آتی ہے خوب آتی ہے

ہاں مگر وقت پر نہیں آتی

آنکھ جو دیکھتی ہے وہ صورت

آئینے میں نظر نہیں آتی

تم مرے چارہ گر ہو اور تم کو

میری مشکل نظر نہیں آتی

سچ تو یہ ہے کہ اب تمہاری یاد

اکثر و بیشتر نہیں آتی

جاوید صبا عہد حاضر کے ایک ممتاز شاعر ہیں۔ ان کا اصل نام سید جاوید حسن ہے اور 03 مارچ 1958 میں پاکستان کے شہر کراچی میں آنکھ کھولی۔

Unlock the Power of Language & AI