کج نگاہی میں بھی جادو ہے فسوں ہے یوں ہے

بادہ کم کم ہے مگر نشہ فزوں ہے یوں ہے

عہد و پیمان وفا چلیے ہمی نے توڑا

یوں اگر ہے بھی تو فرمائیے کیوں ہے،یوں ہے

جام و مینا و سبو سب ترے فریادی ہیں

تیری گردن پہ صراحی کا بھی خوں ہے یوں ہے

حسد و رشک و رقابت ہے متاع عشاق

نظر بد بھی یہاں نیک شگوں ہے یوں ہے

اس نے یہ کہہ کے مری ساری دلیلیں رد کیں

جی نہیں یوں نہیں بالکل نہیں یوں ہے یوں ہے

ٹک کے بیٹھوں تو سمندر سے کنواں ہو جائوں

بے قراری ہی مجھے وجہہ سکوں ہے یوں ہے

کوئی اچھا ہے تو اچھا اسے ثابت بھی کرو

یوں ہی کہہ دینے سے کیا ہوتا ہے یوں ہے یوں ہے

شاعری کیا ہے مری کچھ بھی نہیں کچھ بھی نہیں

وحشت دل کو چھپانے کا جنوں ہے یوں ہے

میر صاحب کو سنائی ہے ابھی تازہ غزل

ان کی جانب سے ابھی ہاں نہیں ہوں ہے یوں ہے

سوگ میں ڈوب کے لکھو تو لکھو حرف صبا

پرچم شعر و سخن یوں بھی نگوں ہے یوں ہے

جاوید صبا عہد حاضر کے ایک ممتاز شاعر ہیں۔ ان کا اصل نام سید جاوید حسن ہے اور 03 مارچ 1958 میں پاکستان کے شہر کراچی میں آنکھ کھولی۔

Unlock the Power of Language & AI