میں کب سے اپنی تلاش میں ہوں ملا نہیں ہوں

سوال یہ ہے کہ میں کہیں ہوں بھی یا نہیں ہوں

یہ میرے ہونے سے اور نہ ہونے سے منکشف ہے

کہ رزم ہستی میں کیا ہوں میں اور کیا نہیں ہوں

میں شب نژادوں میں صبح فردا کی آرزو ہوں

میں اپنے امکاں میں روشنی ہوں صبا نہیں ہوں

گلاب کی طرح عشق میرا مہک رہا ہے

مگر ابھی اس کی کشت دل میں کھلا نہیں ہوں

نہ جانے کتنے خداؤں کے درمیاں ہوں لیکن

ابھی میں اپنے ہی حال میں ہوں خدا نہیں ہوں

کبھی تو اقبال مند ہوگی مری محبت

نہیں ہے امکاں کوئی مگر مانتا نہیں ہوں

ہواؤں کی دسترس میں کب ہوں جو بجھ رہوں گا

میں استعارہ ہوں روشنی کا دیا نہیں ہوں

میں اپنی ہی آرزو کی چشم ملال میں ہوں

کھلا ہے در خواب کا مگر دیکھتا نہیں ہوں

ادھر تسلسل سے شب کی یلغار ہے ادھر میں

بجھا نہیں ہوں بجھا نہیں ہوں بجھا نہیں ہوں

بہت ضروری ہے عہد نو کو جواب دینا

سو تیکھے لہجے میں بولتا ہوں خفا نہیں ہوں

پیرزادہ قاسم

پیرزادہ قاسم رضا صدیقی 8 فروری 1943ء کو دہلی میں پیدا ہوئے، تقسیم ہند کے بعد والدین کے ساتھ کراچی آگئے پیر زادہ قاسم نے ڈی جے سائنس کالج سے انٹر اور جامعہ کراچی سے بی ایس سی (آنر) کے بعد ایم ایس سی کا امتحان پاس کیا۔ اس کے بعد نیو کیسل یونیورسٹی برطانیہ سے پی ایچ ڈی کی ڈگری حاصل کی۔ تعلیم سے فارغ ہونے کے بعد درس و تدریس کا پیشہ اختیار کیا۔ 1960ء میں جامعہ کراچی میں بحیثیت لیکچرار مقرر ہوئے۔ دوران ملازمت وہ جامعہ کراچی کے پرووائس چانسلر اور رجسٹرار، رکن سنڈیکیٹ، مشیر امور طلبہ اور دیگر اہم کمیٹیوں کے رکن بھی رہے۔ پیرزادہ قاسم 2012ء تک جامعہ کراچی کے وائس چانسلر بھی رہے۔ ، وفاقی اردو یونیورسٹی اور ضیاء الدین یونیورسٹی کے بھی وائس چانسلر بنے رہے پیرزادہ قاسم 1960ء سے شعر کہہ رہے ہیں۔ انھوں نے تمام صنف سخن میں طبع آزمائی کی ہے، مگر غزل ان کا خاص میدان ہے۔ 1996ء میں دبئی میں جشن پیرزادہ قاسم بڑی شان وشوکت سے منایا گیا۔ ا ن کی تصانیف کے نام یہ ہیں : ’تند ہوا کے جشن میں ‘‘، ’’شعلے پہ زبان‘‘۔ آپ اردو زبان کے ممتاز شعرا کی فہرست میں نمایاں مقام رکھتے ہیں اور تمام دنیا میں بحیثیت شاعر اپنی الگ شناخت کے حامل ہیں۔

میں کب سے اپنی تلاش میں ہوں ملا نہیں ہوں

More poems from same author

Unlock the Power of Language & AI

Lughaat

Spell Checker

OCR