مئے گل رنگ سے لبریز رہیں جام سفید

چشم بدبیں کو کرے گردش ایام سفید

بسکہ اس بت کی طبیعت ہے زمانے سے خلاف

صبح پوشاک سیہ ہے تو سر شام سفید

کون سی شام نہیں صبح ہوئی اے مغرور

ایک دن ہوتی ہے یہ زلف سیہ فام سفید

قطرۂ اشک میں سرخی کا کہیں نام نہیں

لہو تیرا بھی ہوا اے دل ناکام سفید

دل کی تسکیں کو میں پیغام صفا کا سمجھوں

پرزہ کاغذ کا جو بھیجے وہ گل اندام سفید

چاندنی رات میں وہ ماہ جو یاد آتا ہے

کاٹنے دوڑتے ہیں مجھ کو در و بام سفید

وصل کی شب جو ہوئی صبح یکایک تو ہوا

میں ادھر زرد ادھر روئے دلارام سفید

نسبت اس فتنۂ دوراں سے کوئی اندھا دے

یار کی آنکھ سیہ دیدۂ بادام سفید

کسی حالت میں نہیں فکر سے دشمن غافل

آفت مرغ ہے رنگین ہو بادام سفید

بس ہے اتنی ہی زمانہ کی دو رنگی آتشؔ

مئے گل رنگ سے لبریز رہیں جام سفید

خواجہ حیدر علی آتش

خواجہ حیدر علی آتش خواجہ علی بخش کے بیٹے تھے۔ بزرگوں کا وطن بغداد تھا جو تلاش معاش میں شاہجہان آباد چلے آئے۔ نواب شجاع الدولہ کے زمانے میں خواجہ علی بخش نے ہجرت کرکے فیض آباد میں سکونت اختیار کی۔ آتش کی ولادت یہیں 1778ءمیں ہوئی ۔ بچپن ہی میں باپ کا سایہ سر سے اُٹھ گیا۔ اس لیے آتش کی تعلیم و تربیت باقاعدہ طور پر نہ ہو سکی اور مزاج میں شوریدہ سری اور بانکپن پیدا ہو گیا۔ آتش نے فیض آباد کے نواب محمد تقی خاں کی ملازمت اختیار کر لی اور ان کے ساتھ لکھنؤ چلے آئے۔ نواب مذاق سخن بھی رکھتے تھے۔ اور فن سپاہ گری کے بھی دل دادہ تھے۔ آتش بھی ان کی شاعرانہ سپاہیانہ صلاحیتوں سے متاثر ہوئے۔ لکھنؤ میں علمی صحبتوں اور انشاء و مصحفی کی شاعرانہ معرکہ آرائیوں کو دیکھ کر شعر و سخن کا شوق پیدا ہوا۔ اور مضحفی کے شاگرد ہو گئے۔ تقریباً 29 سال کی عمر میں باقاعدہ شعر گوئی کا آغاز ہوا۔ لکھنؤ پہنچنے کے کچھ عرصہ بعد نواب تقی خاں کا انتقال ہو گیا۔ اس کے بعد انہوں نے کسی کی ملازمت اختیار نہیں کی۔ آخری وقت میں بینائی جاتی رہی۔ 1846ء میں انتقال ہوا۔ آتش نے نہایت سادہ زندگی بسر کی۔ کسی دربار سے تعلق پیدا نہ کیا اور نہ ہی کسی کی مدح میں کوئی قصیدہ کہا۔ قلیل آمدنی اور تنگ دستی کے باوجود خاندانی وقار کو قائم رکھا۔

مئے گل رنگ سے لبریز رہیں جام سفید

More poems from same author

Unlock the Power of Language & AI

Lughaat

Spell Checker

OCR