تیری جو یاد اے دل خواہ بھولا

باللہ بھولا واللہ بھولا

فرقت کی شب میں جاں سوز دل نے

اف اف کیا جو آہ آہ بھولا

کج رکھ نہ پا کو جا دل سے غافل

پھیر اس نے کھایا جو راہ بھولا

زنار ڈالا تسبیح پھیکی

عشق صنم میں اللہ بھولا

خور نے گرایا اس کو نظر سے

جو ذرہ تیری درگاہ بھولا

زلف رسا کو سمجھا جو افعی

چوکا وہ قصر کوتاہ بھولا

دیکھے سے تیرا روئے منور

ہم مہر بھولا ہم ماہ بھولا

محروم رکھا ساقی نے ہم کو

اپنے گدا کو جم جاہ بھولا

بت خانہ چھوڑا باز آئے بت سے

وہ شہر بھولا وہ شاہ بھولا

شرط وفا کی کس بے وفا سے

آتشؔ سا عارف آگاہ بھولا

خواجہ حیدر علی آتش

خواجہ حیدر علی آتش خواجہ علی بخش کے بیٹے تھے۔ بزرگوں کا وطن بغداد تھا جو تلاش معاش میں شاہجہان آباد چلے آئے۔ نواب شجاع الدولہ کے زمانے میں خواجہ علی بخش نے ہجرت کرکے فیض آباد میں سکونت اختیار کی۔ آتش کی ولادت یہیں 1778ءمیں ہوئی ۔ بچپن ہی میں باپ کا سایہ سر سے اُٹھ گیا۔ اس لیے آتش کی تعلیم و تربیت باقاعدہ طور پر نہ ہو سکی اور مزاج میں شوریدہ سری اور بانکپن پیدا ہو گیا۔ آتش نے فیض آباد کے نواب محمد تقی خاں کی ملازمت اختیار کر لی اور ان کے ساتھ لکھنؤ چلے آئے۔ نواب مذاق سخن بھی رکھتے تھے۔ اور فن سپاہ گری کے بھی دل دادہ تھے۔ آتش بھی ان کی شاعرانہ سپاہیانہ صلاحیتوں سے متاثر ہوئے۔ لکھنؤ میں علمی صحبتوں اور انشاء و مصحفی کی شاعرانہ معرکہ آرائیوں کو دیکھ کر شعر و سخن کا شوق پیدا ہوا۔ اور مضحفی کے شاگرد ہو گئے۔ تقریباً 29 سال کی عمر میں باقاعدہ شعر گوئی کا آغاز ہوا۔ لکھنؤ پہنچنے کے کچھ عرصہ بعد نواب تقی خاں کا انتقال ہو گیا۔ اس کے بعد انہوں نے کسی کی ملازمت اختیار نہیں کی۔ آخری وقت میں بینائی جاتی رہی۔ 1846ء میں انتقال ہوا۔ آتش نے نہایت سادہ زندگی بسر کی۔ کسی دربار سے تعلق پیدا نہ کیا اور نہ ہی کسی کی مدح میں کوئی قصیدہ کہا۔ قلیل آمدنی اور تنگ دستی کے باوجود خاندانی وقار کو قائم رکھا۔

تیری جو یاد اے دل خواہ بھولا

More poems from same author

Unlock the Power of Language & AI

Lughaat

Spell Checker

OCR