سینے سے لگائیں تمہیں ارمان یہی ہے
جینے کا مزہ ہے تو مری جان یہی ہے
صبر اس لیے اچھا ہے کہ آئندہ ہے امید
موت اس لیے بہتر ہے کہ آسان یہی ہے
تو دل میں تو آتا ہے سمجھ میں نہیں آتا
بس جان گیا میں تری پہچان یہی ہے
گیسو کے شریک اور بھی تھے قتل میں میرے
کیا وجہ ہے اس کی کہ پریشان یہی ہے
اس بت نے کہا بوسۂ بے اذن پہ ہنس کر
بس دیکھ لیا آپ کا ایمان یہی ہے
کرتے ہیں بتدریج وہ ظلموں میں اضافہ
مجھ پر اگر ان کا ہے کچھ احسان یہی ہے
ہم فلسفے کو کہتے ہیں گمراہی کا باعث
وہ پیٹ دکھاتے ہیں کہ شیطان یہی ہے
اکبر الہ آبادی