ایک دل کش زہر سے لبریز پیمانے کا نام

زندگی کیا ہے خوشی سے جل کے مر جانے کا نام

عقل ہے بالمصلحت بے اعتمادی کی روش

عشق ہے بے ساختہ ایمان لے آنے کا نام

آگہی کیا ہے مسلسل خود فریبی کا چلن

روشنی کیا ہے فریب مستقل کھانے کا نام

خامشی عریانیٔ مفہوم کا تابش کدہ

گفتگو معشوق کو ملبوس پہنانے کا نام

اب مجھے دار و رسن کی سمت مڑنے دیجئے

آپ نے خود تو چنا تھا میرے افسانے کا نام

خواہشوں کی ابتدا غنچے چٹخنے کی صدا

خواہشوں کی انتہا پھولوں کے مرجھانے کا نام

دوست داری کا یہ پیرایہ بھی کیا دلچسپ ہے

لے رہے ہیں سامنے میرے وہ بیگانے کا نام

ہیں عدمؔ کے ذکر پر کیوں آپ اتنے پر غضب

شمع کے ہم راہ آ جاتا ہے پروانے کا نام

عبدالحمید عدم

عبد الحمید عدم پاکستان کے نامور شاعر ہیں جو رومانی غزلوں کی وجہ سے پہچانے جاتے ہیں۔عبد الحمیدعدم 10 اپریل، 1910ء کو گوجرانوالہ کے ایک گاؤں تلونڈی موسیٰ میں پیدا ہوئے۔ ابتدائی تعلیم گھر پر حاصل کی۔ اسلامیہ ہائی اسکول بھاٹی گیٹ لاہور سے میٹرک پاس کیا۔ پھر پرائیوٹ طور پر ایف اے کیا اور ملٹری اکاونٹس میں ملازم ہو گئے۔ 1939ء میں 10 سال ملازمت کرنے کے بعد عراق چلے گئے۔ وہاں جا کر عراقی لڑکی سے شادی کر لی۔ 1941ء میں ہندوستان آ گئے۔ اور ایس اے ایس کا امتحان امتیازی پوزیشن میں پاس کیا۔ پھر ملٹری اکاونٹس میں ملازمت پر بحال ہو گئے۔ قیام پاکستان کے بعد آپ کا تبادلہ راولپنڈی کر دیا گیا آپ 1948ء میں ملٹری اکاونٹس میں ڈپٹی اسسٹنٹ کنٹرولر مقرر ہوئے۔ اور اپریل، 1966ء میں اس عہدے سے ریٹائر ہوئے۔ ریٹائرمنٹ کے بعد یعسوب کو اپنا اوڑھنا بچھونا بنا لیا۔ عدم نے اپنی شاعری کا آغاز ان دونوں کیا تھا جب اردو شاعری کے آسمان پر اختر شیرانی، جوش ملیح آبادی اور حفیظ جالندھری جیسے روشن ستارے جگمگا رہے تھے۔ عدم نے بھی ان کی راہ پر چلتے ہوئے صرف رومانی شاعری کی اور بے حد مقبول ہوئے۔ اردو زبان کے اس رومانی شاعر نے10 مارچ1981ء میں وفات پائی۔ اور قبرستان ڈرائی پورٹ مغل پورہ کے صدر دروازے کے پاس دفن ہوئے۔

ایک دل کش زہر سے لبریز پیمانے کا نام

More poems from same author

Unlock the Power of Language & AI

Lughaat

Spell Checker

OCR