دھواں سا اک سمت اٹھ رہا ہے شرارے اڑ اڑ کے آ رہے ہیں

یہ کس کی آہیں یہ کس کے نالے تمام عالم پہ چھا رہے ہیں

نقاب رخ سے اٹھا چکے ہیں کھڑے ہوئے مسکرا رہے ہیں

میں حیرتئ ازل ہوں اب بھی وہ خاک حیراں بنا رہے ہیں

ہوائیں بے خود فضائیں بے خود یہ عنبر افشاں گھٹائیں بے خود

مژہ نے چھیڑا ہے ساز دل کا وہ زیر لب گنگنا رہے ہیں

یہ شوق کی واردات پیہم یہ وعدۂ التفات پیہم

کہاں کہاں آزما چکے ہیں کہاں کہاں آزما رہے ہیں

صراحیاں نو بہ نو ہیں اب بھی جماہیاں نو بہ نو ہیں اب بھی

مگر وہ پہلو تہی کی سوگند اب بھی نزدیک آ رہے ہیں

وہ عشق کی وحشتوں کی زد میں وہ تاج کی رفعتوں کے آگے

مگر ابھی آزما رہے ہیں مگر ابھی آزما رہے ہیں

عطا کیا ہے مجازؔ فطرت نے وہ مذاق لطیف ہم کو

کہ عالم آب و گل سے ہٹ کر اک اور عالم بنا رہے ہیں

اسرار الحق مجاز

مجازؔ 19 اکتوبر 1911ء میں قصبہ رودولی ضلع بارہ بنکی میں پیدا ہوئے۔ان کی تاریخ وفات 5 دسمبر 1955 ہے۔ان کا حقیقی نام اسرارالحق اور مجازؔ تخلص اختیار کیا۔تعلیم کے لیے مجازؔ لکھنؤ آئے اور یہاں سے ہائی اسکول پاس کیا۔ لکھنؤ سے اس قدر لگاؤ ہوا کہ مجازؔ نے اپنے تخلص میں لکھنؤ جوڑ لیا اور مجازؔ لکھنوی کے نام سے جانے گئے۔مجازؔ نے 1935 میں علی گڑھ مسلم یونیورسٹی سے بی اے کیا تھا۔1936میں دہلی ریڈیو اسٹیشن سے شائع ’آواز‘ کے پہلے مدیر مجازؔ ہی تھے۔ انہوں نے کچھ وقت بمبئی انفارمیشن میں بھی کام کیا تھا اور پھر لکھنؤ آکر ’نیا ادب‘ اور ’پرچم‘ کی ادارت کی۔ اس کے بعد دہلی میں ہارڈنگ لائبریری سے منسلک ہوئے تھے۔ 3دسمبر 1955کو لکھنؤ میں مجازؔ ایک مشاعرے میں شامل ہوئے تھے۔ اس کے دو دن بعد یعنی 5 دسمبر 1955کو وہ انتقال کر گئے تھے۔2008میں ایک ڈاک ٹکٹ حکومت ِ ہند کی جانب سے مجاز کی یاد میں جاری ہوا تھا۔

دھواں سا اک سمت اٹھ رہا ہے شرارے اڑ اڑ کے آ رہے ہیں

More poems from same author

Unlock the Power of Language & AI

Lughaat

Spell Checker

OCR