اس شہر کے یہیں کہیں ہونے کا رنگ ہے

اس خاک میں کہیں کہیں سونے کا رنگ ہے

پائیں چمن ہے خود رو درختوں کا جھنڈ سا

محراب در پہ اس کے نہ ہونے کا رنگ ہے

طوفان ابر و باد نہاں ساحلوں پہ ہے

دریا کی خامشی میں ڈبونے کا رنگ ہے

اس عہد سے وفا کا صلہ مرگ‌ رائیگاں

اس کی فضا میں ہر گھڑی کھونے کا رنگ ہے

ہے سر زمین شور کہ اک چادر صفا

کیسا عجیب مردہ بچھونے کا رنگ ہے

سرخی ہے جو گلاب سی آنکھوں میں اے منیرؔ

خار بہار دل میں چبھونے کا رنگ ہے

منیر نیازی

منیر نیازی (9 اپریل 1923ء - 26 دسمبر 2006ء) کا شمار اردو اور پنجابی کے اہم تر شاعروں میں ہوتا ہے۔ ان کی ابتدائی شاعری قیام ساہیوال کے ایام کی یادگار ہے۔ منٹگمری (اب ساہیوال) میں انھوں نے ۔۔سات رنگ۔۔۔کے نام سے ایک ادبی رسالہ بھی جاری کیا۔ لاہور منتقلی کے بعد فلمی گانے بھی لکھے۔ منیر نیازی کی غزل میں حیرت اور مستی کی ملی جلی کیفیات نظر آتی ہیں۔ ان کے ہاں ماضی کے گمشدہ منظر اور رشتوں کے انحراف کا دکھ نمایاں ہے۔منیر نیازی ضلع ہوشیار پور (مشرقی پنجاب) کے ایک گاؤں میں پیدا ہوئے۔انہوں نے بی اے تک تعلیم پائی اور جنگ عظیم کے دوران میں ہندوستانی بحریہ میں بھرتی ہو گئے لیکن جلد ہی ملازمت چھوڑ کر گھر واپس آ گئے۔ برصغیر کی آزادی کے بعد لاہور آ گئے۔ان کے اردو شاعری کے تیرہ، پنجابی کے تین اور انگریزی کے دو مجموعے شائع ہوئے۔ ان کے مجموعوں میں بے وفا کا شہر، تیز ہوا اور تنہا پھول، جنگل میں دھنک، دشمنوں کے درمیان میں شام، سفید دن کی ہوا، سیاہ شب کا سمندر، ماہ منیر، چھ رنگین دروازے، شفر دی رات، چار چپ چیزاں، رستہ دسن والے تارے، آغاز زمستان، ساعت سیار اور کلیات منیر شامل ہیں۔

اس شہر کے یہیں کہیں ہونے کا رنگ ہے

More poems from same author

Unlock the Power of Language & AI

Lughaat

Spell Checker

OCR