نصیحت

کرے دشمنی کوئی تم سے اگر

جہاں تک بنے تم کرو درگزر

کرو تم نہ حاسد کی باتوں پہ غور

جلے جو کوئی اس کو جلنے دو اور

اگر تم سے ہو جائے سرزد قصور

تو اقرار و توبہ کرو بالضرور

بدی کی ہو جس نے تمہارے خلاف

جو چاہے معافی تو کر دو معاف

نہیں، بلکہ تم اور احساں کرو

بھلائی سے اس کو پشیماں کرو

ہے شرمندگی اس کے دل کا علاج

سزا اور ملامت کی کیا احتیاج

بھلائی کرو تو کرو بے غرض

غرض کی بھلائی تو ہے اک مرض

جو محتاج مانگے تو دو تم ادھار

رہو واپسی کے نہ امیدوار

جو تم کو خدا نے دیا ہے تو دو

نہ خست کرو اس میں جو ہو سو ہو

اسماعیل میرٹھی

اسماعیل میرٹھی 12نومبر 1844کو میرٹھ کے ایک محلے مشائخان میں پیدا ہوئے تھے۔ اب یہ علاقہ اسما عیل نگر کے نام سے معروف ہے۔ مولانا اسمٰعیل میرٹھی،12نومبر، 1844 عیسوی کو میرٹھ میں پیدا ہوئے۔ اب یہ محلہ اسمٰعیل نگر کے نام سے موسوم ہے۔ آپ کے والد کا نام شیخ پیر بخش تھا اور یہی آپ کے پہلے استاد بھی تھے۔ اس دور کے رواج کے مطابق مولانا نے ابتدائی تعلیم گھر پر ہی حاصل کی۔ پہلے فارسی اور پھر دس برس کی عمر میں ناظرہ قرآن مجید کی تعلیم مکمل کی۔ 1857 کی جنگِ آزادی کی تحریک کے وقت 14سالہ اسمٰعیل نے محسوس کر لیا تھا کہ اس وقت اس مردہ قوم کو جگانے اور جگائے رکھے کی ضرورت ہے۔ چنانچہ اسی مقصد کے تحت انھوں نے دینی علوم کی تکمیل کے بعد جدیدعلوم سیکھنے پرتوجہ دی، انگریزی میں مہارت حاصل کی، انجنیئرنگ کا کورس پاس کیا، مگر ان علوم سے فراغت کے بعد اعلیٰ ملازمت حاصل کرنے کی بجائے تدریس کا معزز پیشی اختیار کیا تاکہ اس راہ سے قوم کو اپنے کھوئے ہوئے مقام تک واپس لے جانے کی کوشش کریں۔ تعلیم مکمل کرنے کے بعد اسما عیل میرٹھی نے سررشتہ تعلیم میں ملازمت اختیار کی جہاں ان کی ملاقات قلق میرٹھی سے ہوئی۔ قلق میرٹھی نے انگریزی کی پندرہ اخلاقی نظموں کا منظوم ترجمہ ’جواہر منظوم‘ کے نام سے کیا تھا۔ اس منظوم ترجمے نے اسما عیل میرٹھی کو بہت متاثر کیا، جس سے نہ صرف ان کی شاعری میں بلکہ جدید اردو نظم میں وہ انقلاب برپا ہوا کہ اردو ادب جدید نظم کے نادر خزانے سے مالامال ہو گیا۔

نصیحت

More poems from same author

Unlock the Power of Language & AI

Lughaat

Spell Checker

OCR