تتلی

تتلی اہا جی تتلی

رنگین اور چتلی

ننھی سی بھولی بھالی

پھولوں سے بھی نرالی

باغوں میں رہنے والی

رنگت پروں کی گہری

کچھ سرخ کچھ سنہری

دونوں پروں میں دھاری

قدرت نے ہے سنواری

لگتی ہے کیسی پیاری

پہنی ہے تنگ کرتی

اس پر غضب کی پھرتی

پل میں اگر یہاں ہے

دیکھو تو پھر وہاں ہے

بتلاؤ اب کہاں ہے

دیکھو وہ جا رہی ہے

اے لو وہ آ رہی ہے

پھولوں کے پاس آئی

آئی مگر نہ بیٹھی

پھر اس طرف کو پلٹی

اب چپکے چپکے جاؤں

اس کو پکڑ کے لاؤں

چکر لگا رہا ہوں

اس کو تھکا رہا ہوں

پھرتی دکھا رہا ہوں

اف تیز ہے یہ کتنی

تتلی ہے یا کہ فتنی

اک تاک بھی جمائی

پھر دوڑ بھی لگائی

لیکن نہ ہاتھ آئی

اک تو نہیں بہت ہیں

یہ ہر کہیں بہت ہیں

پر ان کے پیارے پیارے

جن پر کھلے ہیں تارے

دیتے ہیں کیا نظارے

دیکھو تو ڈھنگ ان کے

جانچو تو رنگ ان کے

بالکل سفید کوئی

اک زرد اک گلابی

اک آتشی پیازی

ننھی سی جان ان کی

یہ آن بان ان کی

یہ موہنی سی مورت

ہے کتنی خوب صورت

اللہ تیری قدرت

حفیظ جالندھری

ابو الاثر حفیظ جالندھری پاکستان سے تعلق رکھنے والے اردو کے نامور مقبول رومانی شاعر اور افسانہ نگار تھے جنھوں نے پاکستان کے قومی ترانہ کے خالق کی حیثیت سے شہرتِ دوام پائی۔ ملکہ پکھراج نے ان کی نظم ابھی تو میں جوان ہوں کو گا کر شہرت دی۔حفیظ جالندھری ہندوستان کے شہر جالندھر میں 14 جنوری 1900ء کو پیدا ہوئے۔ آزادی کے وقت 1947ء میں لاہور آ گئے۔ آپ نے تعلیمی اسناد حاصل نہیں کی، مگر اس کمی کو انہوں نے خود پڑھ کر پوری کیا۔ انھیں نامور فارسی شاعر مولانا غلام قادر بلگرامی کی اصلاح حاصل رہی۔ آپ نے محنت اور ریاضت سے نامور شعرا کی فہرست میں جگہ بنالی۔ حفیظ جالندھری پاک فوج میں ڈائریکٹر جنرل مورال، صدر پاکستان کے چیف ایڈوائزر اور رائٹرز گلڈ کے ڈائریکٹر کے منصب پر بھی فائز رہے۔حفیظ جالندھری گیت کے ساتھ ساتھ نظم اور غزل دونوں کے قادرالکلام شاعر تھے۔ تاہم ان کا سب سے بڑا کارنامہ شاہنامہ اسلام ہے، جو چار جلدوں میں شائع ہوا۔ اس کے ذریعہ انہوں نے اسلامی روایات اور قومی شکوہ کا احیاء کیا، جس پر انہیں فردوسی اسلام کا خطاب دیا گیا۔ حفیظ جالندھری کا دوسرا بڑا کارنامہ پاکستان کا قومی ترانہ ہے، اس ترانے کی تخلیق کی وجہ سے وہ ہمیشہ یاد رکھے جائیں گے۔ حفیظ جالندھری نے یہ خوب صورت قومی ترانہ احمد جی چھاگلہ کی دھن پر تخلیق کیا تھا اور حکومت پاکستان نے اسے 4 اگست 1954ء کو پاکستان کے قومی ترانے کے طور پر منظور کیا تھا۔حفیظ جالندھری کی شاعری کی خوبی اس کی غنائیت ہے۔ وہ خود بھی مترنم تھے اس لیے انہوں نے ایسی لفظیات کا انتخاب کیا جو غنائیت کے پیکر پر پورے اترتے ہیں۔ غنائیت کا سبب ان کی گیت نگاری بھی ہے۔ انہوں نے دوسری جنگ عظیم کے زمانے میں فوجی گیت لکھے تھے اور گیت کو بھی انہوں نے نئے پیکر عطا کیے۔ شاید اسی لیے آج تک حفیظ جالندھری کی شناخت ابھی تو میں جوان ہوں کے حوالے سے کی جاتی ہے۔ بلا شبہ یہ ایک پر اثر گیت ہے کیوں کہ اس میں جو الفاظ استعمال کیے گئے ہیں وہ اپنی جگہ پر نگینے کی طرح جڑے ہوئے ہیں اور سامع کے دل پر گہرا اثر چھوڑتے ہیں۔ لیکن حقیقت یہ بھی ہے کہ حفیظ کی غزلوں کا سرمایہ کافی ہے اور حفیظ خود کو غزل گو کہلوانا پسند کرتے تھے۔ انہوں نے غزل میں بہت سے نئے تجربات کیے۔ سب سے بڑی بات یہ ہے کہ سلیس زبان کا استعمال کیا اور گرد و پیش کے واقعات کو اپنی غزلوں کا موضوع بنایا۔ ایک طرح سے انہوں نے غزل کو فطری پوشاک عطا کی۔ ان کے یہاں روایت سے بغاوت ملتی ہے۔

تتلی

More poems from same author

Unlock the Power of Language & AI

Lughaat

Spell Checker

OCR