کیا حقیقت کہوں کہ کیا ہے عشق

حق شناسوں کے ہاں خدا ہے عشق

دل لگا ہو تو جی جہاں سے اٹھا

موت کا نام پیار کا ہے عشق

اور تدبیر کو نہیں کچھ دخل

عشق کے درد کی دوا ہے عشق

کیا ڈبایا محیط میں غم کے

ہم نے جانا تھا آشنا ہے عشق

عشق سے جا نہیں کوئی خالی

دل سے لے عرش تک بھرا ہے عشق

کوہ کن کیا پہاڑ کاٹے گا

پردے میں زور آزما ہے عشق

عشق ہے عشق کرنے والوں کو

کیسا کیسا بہم کیا ہے عشق

کون مقصد کو عشق بن پہنچا

آرزو عشق مدعا ہے عشق

میرؔ مرنا پڑے ہے خوباں پر

عشق مت کر کہ بد بلا ہے عشق

میر تقی میر

خدائے سخن، سرتاج شعرا، میر تقی میر کا اصل نام میر محمد تقی اور میر ان کا تخلص تھا۔ میر تقی میر، آگرہ میں 1723ء میں پیدا ہوئے۔ میر کا زمانہ شورشوں اور فتنہ و فساد کا زمانہ تھا۔ ہر طرف تنگدستی و مشکلات برداشت کرنے کے بعد بالآخر میر گوشہ عافیت کی تلاش میں لکھنؤ روانہ ہو گئے۔ اور سفر کی صعوبتوں کے بعد لکھنؤ پہنچے۔ وہاں ان کی شاعری کی دھوم مچ گئی۔ نواب آصف الدولہ نے تین سو روپے ماہوار وظیفہ مقرر کر دیا۔ اور میر آرام سے زندگی بسر کرنے لگے۔ لیکن تند مزاجی کی وجہ سے کسی بات پر ناراض ہو کر دربار سے الگ ہو گئے۔ آخری تین سالوں میں جوان بیٹی او ر بیوی کے انتقال نے صدمات میں اور اضافہ کر دیا۔ آخر اقلیم سخن کا یہ حرماں نصیب شہنشاہ 87 سال کی عمر پا کر 1810ء میں لکھنؤ کی آغوش میں ہمیشہ کے لیے سو گیا۔ مت سہل ہمیں جانو پھرتا ہے فلک برسوں تب خاک کے پردے سے انسان نکلتے ہیں

کیا حقیقت کہوں کہ کیا ہے عشق

More poems from same author

Unlock the Power of Language & AI

Lughaat

Spell Checker

OCR