اَسمانی تارے وے
بازی دل والی اَسی جِت کے وی ہارے وے
کنڈھے ڈُب گئے نہراں دے
تیرے میرے پیار دیاں اج چڑھ گیّاں لہراں وے
کِیہہ لوڑ اے قَسماں دی
کچ پکّی ڈور چَنّاں ایناں جگ دِیاں رَسماں دی
کجَلے دی دھاری اے
دِل جیہی شے ماہیا تیرے قدماں توں واری اے
ہَتھیں مہندی لائی اے
سَجریاں چاواں دی اَساں سیج سجائی اے
گوہڑے رنگ نے دوپٹیاں دے
ڈَھنگ وَکھ دُنیا توں ایس عشق دے پَھٹیاں دے
کِھڑی ہونٹاں تے لالی اے
جیہڑی ماہیے دل وَس گئی اوہ کرماں والی اے
پلکاں دِیاں چھانواں نے
تیریاں باہواں وِچ اَج میریاں باہواں نے
ساہواں وچ ساہ گھل دے
عُمراں دے کَجّے ہوئے اَج بھیت پئے کُھل دے
ایہ چھوٹیاں راتاں وے
عُمراں مُک جانیاں نئیں مُکنیاں باتاں وے
جِند جان وی دے داں گی
سوہنی دے مَیں قولاں دی کچّے گھڑے تے وی ٹِھل پاں گی
چِیچی وِچ چَھلّا وے
جے مینوں کُجھ ہو گیا رہ جائیں گا کلّا وے
اِک رنگ نہ مَرداں دا
اَج اَیتھے کل اَوتھےایہہ جُھرمٹ بدلاں دا
احمد راہی