بَھیناں دیو وِیرو

چُنّی میری لِیراں کتِیراں بَھیناں دیو وِیرو ! وے چُنّی میری لِیراں کتِیراں بُجّھیاں کِھتّیاں ڈُبّ گئے تارے رات ہنیری کِھلّیاں مارے سہک رہیاں تقدِیراں، بھیناں دیو وِیرو ! وے چُنّی میری لِیراں کتِیراں ٹُٹّیاں ساریاں حدّاں بَنّے اَیتھے سارے ہو گئے اَنّھے بَھیناں لُٹیاں وِیراں، بَھیناں دیو وِیرو ! وے چُنّی میری لِیراں کتِیراں لیکھاں اُتے شاہیاں ڈُھلیاں سیجوں ڈِگّ کے پیریں رُلیاں سَسّیاں، سوہنیاں، ہِیراں، بَھیناں دیو ویرو موت دِیاں وی بند نیں راہواں ساہڈیاں کیہہ تقصیراں بَھیناں دیو ویرو وے چُنّی میری لِیراں کتِیراں بَھین کِسے دی پَئی کُرلاوے کُھنجھیا ویلا ہَتھ نہ آوے کرلؤ کُجھ تدبیراں، بھیناں دیو ویرو ! وے چُنّی میری لِیراں کتِیراں