کُجھ کہن نُوں جی پیا کَردا اے

کُجھ کہن نُوں جی پیا کَردا اے کُجھ کہن توں وی پیا ڈَردا اے کُجھ کہیۓ پاگل کہندے نیں چُپ رہئیے سِینا سَڑدا اے کُجھ کہن نُوں جی پیا کردا اے کُجھ کہن توں وِی پیا ڈَردا اے ایتھے تَن توں لِیڑے لاہؤندے نیں کر نَنگے جِسم نچاؤندے نیں عزتاں دے سِر کوئی کَجدا نئیں لاشاں نُوں خُوب سجاؤندے نیں کُجھ کہن نُوں جی پیا کردا اے کُجھ کہن توں وِی پیا ڈَردا اے ایتھے جذبے وِکدے ویکھے نیں ایتھے ہاڑے وِکدے ویکھے نیں اس جگ دِی اُلٹی گنگا وِچ پُھل ڈُبدا، پتّھر تَردا اے کُجھ کہن نُوں جی پیا کردا اے کُجھ کہن توں وِی پیا ڈردا اے دَھن دولت دَھرم اِیمان ایتھے گِیتا، انجیل، قُرآن ایتھے ایس دولت بدلے ہر کوئی ہَس ہَس کے سُولی چَڑھدا اے کُجھ کہن نُوں جی پیا کردا اے کُجھ کہن توں وِی پیا ڈردا اے کیہ رِشتے ناطے مان ایتھے؟ ہے دَولت رام رحمان ایتھے ایتھے دِن نُوں گُھپ ھنیرے نیں راتاں نُوں سُورج چڑھدا اے کُجھ کہن نُوں جی پیا کردا اے کُجھ کہن توں وِی پیا ڈردا اے ایتھے لیڈر پان بُھلیکھے جی ایتھے لُٹ دے لمبے لیکھے جی ہر بندہ ایتھے ہَر ویلے پَیسے دا کلمہ پڑھدا اے کُجھ کہن نُوں جی پیا کردا اے کُجھ کہن توں وِی پیا ڈردا اے