بھلی دنیاں ایویں کلجگ کلجگ کوکدی
مینوں ستجگ آؤندا دیہدا وچ جہان دے
جہڑا آدم اک دن کھڈاں دے وچ رہندا سی
اوہدے پتر اڈدے پھردے وچ اسمان دے
نظراں لیندے سی جو کرامات دے مان 'تے
ہتھ بنھ کھلے دیوتے اگے سائنسدان دے
بھلے لوکیں اک دن وہلڑ نوں سی پوجدے
چنگے کامے نوں اج سمجھدار سنمان دے
دنیاں بھیکھاں دی تھاں عملاں ولے ونہدی اے
جاندے ارتھ بدلدے دن دن دھرم ایمان دے
مالا والے دی تھاں عزت اج مزدور دی
چلے بدل نظرئیے آدم دی سنتان دے
اک دن پیش ہونگے پھٹیاں لیراں سامھنے
پھردے ریشم وچ جو چیلے لکے شیطان دے
جنھاں کلیاں وچ نہ سورج ڈردا جھاکدا
اک دن محل ہونگے اوتھے شاہی شان دے
اک دن لالو گھر وی بھوگ پدارتھ ہونگے
ہوسن دور بھلیکھے بھاگو دے پنّ دان دے
ربّ دا روپ سمجھ انسان ملو انسان نوں
درشن بندے وچوں ہوونگے بھگوان دے
پورے بول ہونگے آخر بابے نانک دے
دنیاں سرگ بنیگی وسن یوگ انسان دے
چانن ہو جو سیتل پھیلو دھرم اکال دا
پردے دور ہونگے بھرم اتے اگیان دے
سوہن سنگھ سیتل