ڈونگھے پانی سٹ کے کنکر ویکھ رہیاں
کجھ چپاں دے ٹٹدے منظر ویکھ رہیاں
سورج، چن، پہاڑ، سمندر،پھلواڑی
سوجھاں وچ میں اوہنوں اکثر ویکھ رہیاں
غزل پنجابی نکوں کنوں بچی سی
ہن میں اوہدے پیریں جھانجر ویکھ رہیاں
لکھاں ندیاں پی کے وی جو تسا اے
پلکاں دی سولی تے ساگر ویکھ رہیاں
جیہڑا اپنے اک وی ساہ تے قادر نہیں
اوسے نوں میں جگ تے قادر ویکھ رہیاں
سلھے پنڈے رزق حلال کماون جو
اوہناں دے بچے ای لاغر ویکھ رہیاں
باوا اتوں بگلے جاپن اوہناں دے
کالے کاواں ورگے اندر ویکھ رہیاں
بشیر احمد باوا